أعظم اكتشاف في العالم في سنة 2020م، بيحصل في مصر بسقارة!
كتب-هند حامد
لازم تعرف إن بلدك عظيمة، وإنها عاملة ضجة إعلامية رهيبة في الوقت الحالي.
الإعلام في معظم دول العالم مسلط ضوءُه عليها، لأننا قدام أعظم اكتشاف في العالم في سنة 2020م، بيحصل في مصر بسقارة!
من ساعات تم الإعلان عن أكبر اكتشاف أثري في سنة 2020م، 59 تابوت لحد دلوقتي تم العثور عليهم من الأسرة 26، واللي كان العصر بتاعها اسمه "عصر النهضة"، غير اللي لسه مدفون وبيحاولوا يطلعوه.
والمبهج والجميل في الموضوع إن البعثة اللي بتخرج التوابيت كلها مصرية 100%.
من ضمن التماثيل اللي عثروا عليها تمثال اسمه (عطية آمون)، التمثال طوله 45 سم، مصنوع من البرونز، ومطعم بالأحجار الكريمة، منها العقيق والتركواز، وده تمثال لواحد من الآلهة في الأسرة الـ26، التمثال عظيم لدرجة إن الأمين العام لمجلس الآثار قال إن ده أجمل تمثال مسكته إيده!
ومن ضمن الاكتشافات إن فيه تابوت اتفتح بيرجع لشخص اسمه (بسماتيك)، وحالة جسمه كويسة جدًا، ومتوفي من حوالي 2500 سنة.
البحث لسه شغال لحد دلوقتي، بيحاولوا يكشفوا عن الباقي في سقارة، والحدث ده متغطي عالميًا وحاضر فيه السفير الأمريكي و60 سفير تانيين.
