بقلم:أحمد رأفت
(صوت مجموعة أطفال)
أيها السادة الكبار
مدُّوا إيدكم
واكسروا قيود الصغار
حرّرونا م القلق ..
والخوف ..
ولهفة الانتظار ..
نفسنا نحلم ..
ونطلق صوتنا
على طول المدى
نمحي الليالي السودة
ونجيب النهار ..
حلم (1)
أنا عندي حلم بحجم سنّي
مش كبير
باحلم أشوف إنسان حقيقي
وله ضمير
يكون رفيقي في السفر
وفي الخطر
ألقاه نصير
ويكون لي قدوة
بافتقدها
ويكون إيديا اللي أرفرف بيها
لما أعوز تطير ..
(صوت مجموعة أطفال)
آه يابلد
عايزة ولد
ييجي يحرّر ضحكتك
من أسر بكرة اللي اتولد
مسجون في عتمة سكتك
فين الولد ؟!
فين الولد ؟!
اللي يحرر ضحكتك؟
حلم (2)
أنا مستعد
أكبر واشبّ ..
وافرد جناحات الأمل
واطير لفوق ..
وانزل أدبّ
واركب في مركبتي الورق
وادور ..
وأهزم أي صعب
بس افتحوا لي قلوبكم ..
ادُّوني الأمان
خلّوني أزرع غنوتي
في قلوب تكون
مليانة حب
(صوت مجموعة أطفال)
كل الطرق مرسومة واحنا بنلتقي
من غير طريق
صادقين مع الزمن اللي كدب فينا
إحساسنا البرئ ..
بالرغم من بكرة
بنولد حلمنا
حر ..
وجرئ
بنسيب دواير عشقنا
توسع ..
وتبلع ..
عتمة الحزن العتيق
حلم (3)
طول عمري باحلم
إني اكون
شاطر حسن
فارس ..على حصاني الجسور
واقف وباتحدَّى المحن
في إيديا سيف
مش أي سيف
قادر يطهر أي زيف
قادر يجيب أغصان زيتون
شايلاها حمامات السلام
ترميها في حضن الوطن
(صوت مجموعة أطفال)
آه يا وطن
محتاج لعدل
وطهر
وبراءة
وحنان
جايين ندقدق بالإيدين النونو
على كل البيبان
افتح لنا
واسمع لنا
وادّينا فرصة إننا
نكبر
ويكبر حلمنا
حلم (4)
الحلم زهزه بين عيوني
قاللي قومي
خلي إيديك النونو
تقطف من نجومي
مديت إيديا
وطرت فوق في السما
وقطفت نجمة حب
حلوة منمنمة
وزرعتها في القلب
طرحت أمنياية
فاضت دموع الفرح
بلت لي هدومي
(صوت مجموعة أطفال)
لسانا قادرين يا بشر
نكون زهور
لسانا قادرين نبقى وسط الضلمة نور
لسانا قادرين ننطلق
ونثور على الخوف والقلق
ونكون بلابل حب
تهدم أي سور