أصل الحكاية
بقلم -أشرف فتحي عبد العزيز
أصل الحكاية دايماً فيها أحداث كثير سلبيه وايجابية بس لما تتحكي هتفرق انت بتحكيها لغيرك ازاي، عايز تكون فيها الضعيف المنكسر المظلوم، ولا عايز تكون فيها البطل الشهم الجدع،،،!
وهو ده مضمون الكلام انت عايز تكون أنهى فيهم في الحقيقة، واي حكاية بتقولها للناس انت صادق فيها بنسبة كام ٪ ، حكتها علشان تصعب على الناس ولا علشان تبان البطل الهمام، بس اقولك مش هتفرق معايا حكايتك شكلها ايه واصلها وفصلها...!
هيفرق معايا انت صادق ولا كذاب مش عشاني لا علشان نفسك هي اللي محتاجة تسمع الحقيقة، محتاجة تفوق وتشوف نفسها هي بتعيش بكام وش، علشان تخدع وتغش وتتحايل وتخون..!
عارف الشهامة ايه انك تعمل الفعل من غير ما تستنى شكر عليه والناس هي اللي تتكلم وتحكي عنك، إنك تكون بسيط وقنوع وراضي، إنك مهمة تعمل متقولش انا عملت وخلي جزاك من ربنا على عملك مش من الناس، الضعف انك تكذب او تستعطف أو تمثل على الناس وانت عارف ان ربنا مطلع وشايف...!
اصل الحكاية انها تتحكي من الناس عنك باخلاقك وعملك وطبعك وافعالك، وهي دي تبقي الحكاية اللي هتعيش في حياتك وبعد مماتك ،ربنا يديك طولت العمر واسيبك دلواقتي تختار حكايتك ...!
