يوم ما قالوا أبوكي مات
بقلم- حبيبه حبيب
قلبي مات بعديه بثواني
قلت مين يسندني بعده
ومين ياخدني فـ حضنه تاني؟!
لعنه فراقك صابتنا
فوق يا بابا وقوم عشاني
قول لي إنك باقي ليا
وان كل الناس بتكدب
وان روحك عايشه فيا
مش هصدق مهما قالوا
إنك انت خلاص مشيت
يا اللي حضنك كان عشاني
إيد تدفي وكان لي بيت
كنت لما ازعل بروح لَك
كنت لما افرح بروح لَك
قلبي كان متشال في رَحلَك
وفـ ثواني دا كله راح
بعد عمر فرحته جنبك
سبتني وسط الجراح
كنت ماسك إيدي يومها
سبتها فالموت ناداك
كنت نفسي تكون معايا
جنب مني واكون معاك
صابني داء الهجر بَعدَك
شعري شاب لون الغياب
بنت انا وبروحي طفلة
قاعدة ببكي ف ضهر باب
ضهري كان ضِلك يا بابا
مال ساعتها وراح طريقي
والحياه بعدك حقيقي
اصبحت سودة وكئيبة
كل حاجه جميلة راحت
والبشر صبحت غريبة
كلهم بيقولوا إني
بنت فاشله ومالي قيمه
بس مهما يقولوا هوصل
وافتخر إني اليتيمه
بكره لما يشوفوا اسمي
جنب إسمك يدعوا ليك
تبقى كل الناس ورايا
وابقى انا اللي فخوره بيك
أمشي وسط الناس يقولوا
دي اللي ابوها مالوهش زي
بنت بس بألف راجل
واللي خَلَّف لسه حي
