recent
عاجـــــــــــــــــــــــل

ألوان الدنيا

ألوان الدنيا



بقلم- جمال القاضي

شفت الدنيا بكتير ألوان
لونها الأبيض
بعيون مغشوشه
ناس تلاقيها عايشه الدنيا
بالطول والعرض
تلف شوارع
بسياره جميله وكلها زينه
ومن جواهم إحساس بالنقص
يشوفوا فقير وبإيده اللقمه
كأنها بعيونهم زي شهد
ومن كتير البخل عليهم
زالت النعمه
وصارت الميه
ممنوعه عليهم
وكانوا لحد البارح بس
في نعيم عايشين
ومش حاسين
بحاجة غيرهم للقمة عيش
كان يرموها لكلابهم
وربك ربك كريم
مابينسى فقير
رغم الحاجه لبعض المال
بس الصحه جوه قلوبهم
أفضل من كنز ومال
تلقاه عيش وسط اللمه
وحاسس بيهم
أفراح تلاقيه موجود
لإنه أصيل
أول واحد واقف
فرحهم فرحه
حتى الحزن تلقاه
أو حد راح يواسيهم
واللون التاني
كان للدنيا بلونها الإسود
طفل حزين مسكين
تلقى دموعه ماليه عيونه
كان أمانيه يفرح يوم
أو يمسك لعبه زي الغير
ماتت أمه وحتى الأب
أصبح عايش بالدنيا وحيد
دايره تخبط فيه
شمال ويمين
يروح الورشه للعم أمين
صبح وظهر بيضرب فيه
ومن كتر الضرب منه بيهرب
وتجار ماشين
لابيعرف رب ولاحتى
لدين فاكرين
سكينهم تذبح فيه
ويقولوا لاقينه فريسه
نبيع أعضاءها وبعدها
بفلوسها نسهر سهره
ولا التاني لما الشمس
بالليل تغيب
عند زباله يقلب فيها
يمكن فيها بقايا طعام
أو حتى كسرة خبز
أفطر بيها أنا وعيالي الصبح
وست فقيره بجنب طريق
نازله دموعها
والكل شايفها ولايسأل مالك
غريبه يادنيا لما
أشوف أحوالك
كان البارح فيك
تحت السلم
راجل ساكن
بس اليوم بلاقيه
جوه قصورك ساكن
وغيره كمان كان البارح
من كتر فلوسه
كان بيلف الدنيا ويسهر
يحضر سينما
وكل مسارح
بس اليوم على بابها لاقيته
غير البارح
داير يمد إيديه لكل الداخل
وحتى الطالع
لأنه ماكان للنعمه يصونها
زالت منه كل فلوسه
أصل الدنيا فيها أحوالها
كل دقيقه تتغير فيها
مره تصالح ومره تخاصم
وأهو عايشين دنيا غريبه
تخبط فينا ونشوف ألوانها
مره بترضى ومره بتغضب
فيها علينا
ألوان الدنيا



google-playkhamsatmostaqltradent