قصيده بالحسني
منه الله صلاح عابدين
بالحسني بعاملكو وبتكلم عنكم
انا ليكو و فيكو و مش منكم
دي سعادتي بتدايق تفكيركم
خليتو ايه لغريب مش منكم
بستغرب دايما
جايلكوا و بلهفه
زقوني ع الحافه
بستغرب دايما
قوه صداقتي بتفوت بلاد
اخرتها ياخاين بتكون ببعاد
يشهد دمعي في قول المواويل
يشهد حبري في كتابه المراسيل
قيمتكم ليا كانت اكليل
فجعلتم مني شخص عليل
تكدب وتقول كدبه ابريل
12 شهر عندك ابريل
كفياكوا تمثيل
اديني بعاتب
متصالح مع نفسي
مستني الصاحب
اهو كان من نفسي
واقوله فينك ويقولي ظروف
وافتح تليفونه مضموني محذوف
ويبررلي بكلام قال ايه يعني مألوف
وانا قلبي ساعتها مجروح بسيوف
طيب خلاص
احرق مراسيل
لم الكشاكيل
وارمي بإخلاص
ف الركن المهجور
مهو اصله معمور
من ناس غيري
عطلي سيري
بس داين
هتدان
كل مجروح هيجيلو اليوم ويكون جارح
و الجارح هيجيلو اليوم و يصيبه جراح
اصل الي اتزرع عمره ما راح
صاحبي اهوت سابني و راح
زمن عكسي وكمان دوار
شيخ مكنش مكانه في بار
مؤذي اتأذي من سابع جار
عجبي ع الي كان والي صار
متقولش ليه الدنيا ملطشه فيا
مهو
ياتعيش مبسوط وتكون ضحيه
ياتعيش مجروح في عز الفرح
ياتموت فرحان من كتر الجرح
و الحزن
الحزن كف
و الدمع جف
و الجرح خف
و الفرح حف
و القلب دق
وانا قولت لأ
والعيشه زق
والزور بقا حق
والعتمه نور
والزرع بور
واكدب ودور
والزمن هيدور
وادي
قلبك مسرح مجان الكل يخشو
والكل فاكرك ياتعيس بلياتشو
ضحكت عليك
خلق لله
تخبي دموعك
مهي دي المعاناه
فرحان ب دموعك
دا شبعهم جوعك
بتحب في سِـمًکْ
طب سِـمًکْ سـمـك
بتحب في حبك وكمان مش حبك
وحبك حابب اشخاص بتحبك
و الدنيا معانده
بجروحها الحاده
والدمع جليد في دقيقه وساح
طب سر مابينا في دقيقه و فاح
متثقش في قلب متقولش دا ساع
ادي صاحبي خد مصلحته و باع
وبقالي سايب
وكلني خايب
ف لعبه شايب
جالي في بيتي
طب خد بإيدي
استني هشوف
انا عندي ظروف
صدقني بحبك
طب عارف حبك
قتلني ب سِـمًکْ
و لكني بحبك
بالحسني عاملتك
و بقلبي دعيتلك
والقلب ياناس
رقيق حساس
ادي قلبي طيب
و الكل يعيب
والكل تركني في عز المحنه
مع ذلك
بتعامل وكمان بتكلم عنهم بالحسنه
