لسة فاكرك
بقلم - حسين فريد
عشنا وياما عشنا ولسه فاكرك
فاكر كل كلمه كأني لسه مقابلك
كان ليه لازمه جراحنا وليه انتهت الحكايه
وليه بأيدينا نكتب سكه فراق سكه نهاية
وازاي مشينا في طريق مسدود
وليه نفرق شملنا ونحط بينا قيود
كل اما اعبر طريق الاقيكي راسمه حدود
أنا لسه فاكرك فاكر حتى ملامحك
كأني لسه مقابلك
كنا لسه في عز طيشنا
كنا نضحك كنا نجري
كنا نرسم ع الشجر ونقطف ورود
كنا ضحكه مالها حدود
كنا نسمه كنا همسه
كنا شمس في عز ضلمه
نطل ع الدنيا بنهار
كنتي شكلي و كنت شكلك
كنتي يومي و كنتي امسي
كنتي مايه في عز عطشي
كنتي شبعي لما اجوع
كنتي عايشه بين الضلوع
كنتي دار كنتي مأوي
كنت بيكي دايما اقوي
كنتي ليا طوق نجاة
كنتي عمر كنتي حياه
كنتي ذكري ماتنتهي
حتى لو انتهت الحياة
ولو فرقتنا في يوم الظروف
هكتب في وصفك اجمل حروف
هحكي عنك في كل كلامي
في وصفك حبيبتي تتهوه المعاني
وهكتب حكايتك في كل روايه
تاريخ ذكرياتنا واجمل بداية
حكايه عمر عدى وانتي معايا
فجاه لقيتني كبرت لما بصيت في المرايا
