القلم…
للشاعر د. علي مسلم عجمي
في بير أسراري وقع مني القلم
وقع يللي كل أسراري استلم
كيف بدي بعد اكتبلك و صير
تا خبرك فيي صراحة شو ألـم
القلم للشاعر ضروري بالحياة
بيوصف حنان و عطف كل الأمهات
و يكتب قصايد غزل تا يجن الهوى
ياما و ياما القلم عامل معجزات
الكتب السماويه القلم فيها غرس
حروفو و ملايكة السما عليها حرس
الله أكبر كتب فوق المئذنة
و بالكنيسة كتب تا يدق الجرس
نهج البلاغة و كُـتب كل الخالدين
انكتبت بِـأَقْـلام عن حكمة و يقين
الإعلام و رجال الصحافة الماهرين
الكُتّـاب بروايات عشق العاشقين
و كل شي انكتب بالحاضر و ماضي السنين
القلم وحدو خطَّـها بحرفو الأمين
يا قلم لما وقعت و السر الدفين
أخذتو معك و الحزن زودني أنين
من البير نادى القلم اسمع يا فطين
إبري من ضلوعك قلم متلي أنا
تا يظل سـرّك سر ما تصبح رهين
الشاعر… د.علي مسلم عجمي
لبنان