كان يا ما كان (نفسك تربي أولادك صح وببلاش)؟؟؟
كتبت يسرا عاطف
الحلقة الأولي
إن الهدف الأول التي تسعي وراءة كل أم بمختلف الأعمار هي ان تنجح في تربية أولادها بل وتراهم أفضل منها في كل شئ سواء من الناحية التربوية والأخلاقية،، الناحية التعليمية،، المهنية وغيرة .
كل أم منا تتعامل مع أولادها بفطرتها التي وعت عليها ومن رواسب تربيتها من أمها وجدتها فأثناء رحلة التربية تري كل أم أنها تبذل قصارى جهدها من تضحية وإيثار ومشقة ولكن كل هذه المعاناة قد تكون علي غير علم وثقافة فتصبح بدل أن تكون مفيدة تصبح ضارة لهم..
في زحمه الحياة والمسؤولية الواقعة علي كل أم لا يوجد الوقت المتاح لكي تحضر كورسات او تواظب علي قراءة كتب عن فن تربية الأولاد ، ولكن إن شاء الله في هذه الحلقة حاولت أن أشارك معكم العديد من النقاط التي من خلالها نسعي إلي التربية الإيجابية التي تسعي إليها كل أم وأب.
1- لما ابنك أو بنتك كلامي علي الجنسين يلجألك في مشكلة تخصه اسمعي له باهتمام وتفاعل مهما كانت مشاكله بالنسبة لكي تافهه دعيه يشعر من رد فعلك أنها مهمه اوي وانك مهتمه انك تساعديه في حلها ...
سيبك من نظريات التربية الحديثة اللي بتقول سيبي ابنك يحل مشكلته لوحده عشان يعتمد على نفسه..
إحنا عندنا رحمة وأمومة فطرية ما ينفعش ندوس عليها علشان نكبر ولادنا قبل الأوان..
ياخد نصيبه من الرحمة والاحتواء والحنية الأول، ومفيش مانع كل ما يشتد عوده تلقنيه إزاي يبحث عن حل لمشاكله معتمدا على نفسه، لكن ما تعلميهوش أبدا إن عقله يغنيه عن مشورتك ووقفتك جنبه
الاصل هو أنها او انه يشعر أنك سندة في أي موقف ممكن يعدي به في حياته الاصل الاحتواء.
2- لما يقول آسف اقبليها.. بلاش إذلال.. مهما كررها وكرر نفس الخطأ.. لازم يعرف إن الفرق بين "آدم" و إبليس "اعتذار"..
بلاش تيئسيه من عفوك وتقنطيه من رحمتك.. "فاغفر لي فغفر له".. كل ما يغلط إديله أمل إن معلش إنت لسة بتتعلم و كلنا بنغلط ركز انت بس و ادعي لنفسك و ادعيلي معاك.. ونركز أوي علي نقطة أننا منكررش الغلط تاني وانك لازم تتعلم من الاخطاء السابقة وجاهد نفسك علي عدم تكرارها وخلي بالك من نقطة هامة إن كل شيء هتعمليه معاه احتسبي الأجر من عند ربنا وافتكري انك لازم تقدمي بنتك او إبنك زوج او زوجه صالحة علشان غيرك يدعي لكي.
3- اوعوا تناموا وأنتم متخاصمين وزي أي أم مصرية تروحي تبوسيه بعد ما ينام وهو مش حاسس علشان انتي ندمتي علي زعيقك او ضربك له وبس كدة .. لا طبعاً لازم يحس أنك بتحبية وانك بتزعلي لما تضايقيه ولكن هو إللي بيخليكي تعملي كدة بوسوا بعض واتصالحوا قبل النوم مش بعد النوم..
خليه ينام في حفظ الله وأمانه مش ينام وقلبه مكسور.. بلاش يتعود على إن "عادي إن الحبايب يناموا متخاصمين".. لأن الحب تصفية المشاعر أول بأول دون تراكمات..
4- بلاش رفض وصد للعناق وانتي زعلانة منه أو وإنتي ملخومة في حاجة.. علميه ان الحضن مالوش وقت.. بالذات وقته هو وإحنا زعلانين مع بعض...
وعلميه إن دة من أصل الدين و السنة "ادفع بالتي هي أحسن فإذا الذي بينك وبينه عداوة كأنه ولي حميم".. وأن حضنك له هو الأمان كله، وخليكي فاكرة إن في الحقيقة إحنا اللي محتاجين الحضن دة اكتر منهم.
5- لما تلاقيه مزنوق في موقف بايخ بيتهاجم فيه أو ملبوخ ومش عارف يتصرف دافعي عنه أمام الجميع وخليه يحس أنك مش أمه وبس لا أنا المحامي بتاعك واذكري مزاياه للي بيهاجمه أمام الجميع وانك بتحبي صفات فيه كتيره اوي وبتفخري بها فالحب دفاع وحماية وسند .
