ماكنتش أعرف
بقلم:وحيد محروس خليل
ماكنتش أعرف
إن الحقيقة بتكون ساعات
هي الدوا
ولا كان في بالي
إن القسوة من الحبايب
بتموت القلب إللي ياما
بالحب إرتوى
ماهو مش غريب
ياما في جراح مابتشفى
إلا لاما بالنار تنكوى
وإن مفيش طبيب
يقدر يداوي المجروحين
والمغرمين وأهل الهوى
ماكنتش أعرف
ماكنتش أعرف
إن إللي بيضحي
لجل الغير
بينتظر منهم يوم التمن
وإحنا إللي ضحينا
زمان كتير
ولا كان يعني الزمان غير الزمن
وإن إللي خان
هوانا مرة
لا يمكن في يوم راح يؤتمن
وإن إللي ماصان العشرة
بينا جبان وطبعه بيبان
وقت المحن
ماكنتش أعرف
ماكنتش أعرف
إن الهوا في عيون الناس
بقى عيب وحرام
والمشاعر جوا القلوب
وبين البشر تتقدر بكام
دا الحب قدر وكمان مكتوب
ومن غيره إزاي نعيش بسلام
وإن القلب لو يوم دق
في لحظة الكل بيستجيب
وبالأمر يلبي قوام
ماكنتش أعرف
بقلمي الشاعر/ وحيد محروس خليل