محبتنيش ؟ِّ
بقلم / محمد على عاشور
و إيه يعنى محبتنيش
كفايه إنى حبيتها
ولو أسابيع
و لو أيام
و لو ثانية
أنا عمرى
ماكنت ف هامش اللعبه
و مش واحد من الجمهور
وواقف بس أتفرج
و مستنى الحكم ينهى بقا اللعبه
و اقول مره أنا كسبان
و اقول مره أنا خسران
ومكسبتش و مخسرتش
أنا لاعب
ف قلب الماتش
ولو حتى ما جبتش جون
أنا دايما بكون فارس
وقلبى حصان مابيخفش
لأنه أصيل
بيدخل ف السباق دايما
عشان يكسب
و لو كسبان
يقول كسبان
و لو خسران
بكل صلابة و بقوة
يقول خسران
ف عز الصيف
أكون دايما
ف عين الشمس
وأكره أبقى يوم
ف الضل
محبش أبقى بتفرج
على الصورة من الشاشه
و لا كنتش ف يوم كومبارس
و دورى دا البطل دايما أحب اكون
و لو ف الفيلم
فيه أبطال كمان تانيين
مبتهزش و لا أبقى فى يوم
مخضوض
لأن النجمه
كات عينها على التانى
أنا دايما بحب أعيش مع اللحظة
مع اللقطة
أكون فى الكادر
مش بره
يا إبنى إنت متفرج
و مش حتى من الكومبارس
تعيش و تموت بتتفرج
على الأفلام
تعيش دور البطل مره
ف حضن خيالك العيان
يا ريتك جزء م القصة
ولو حتى تكون كومبارس
و لا تفضل كدا واقف
بتتفرج من الخارج
على الأفلام
و تتحسر على الأيام
و تتحسر على الأحلام.