حكاية ست مصرية صعيديه منياوية وصلت للعالمية
كتب - مصطفى الكومى
الست المصرية دميانة نصار حنا بنت قرية البرشا بملوى بمحافظة المنيا او ام ماريو كما يلقبونها فى قريتها عندها ٣ اولاد وهم ماريو و ويصا وفادى وعمرها ٣٩ سنة وبتحب التمثيل من صغرها
ولما كبرت اشتركت مع الاهل والجيران والاصحاب فى فرقة صغيرة بالقرية اسمها بانوراما عشان يشبعوا من خلالها مواهبهم التمثيلية وهواياتهم الفنية
وفى عام ٢٠١٨ فكر مخرج مصرى اسمه عمر الزهيرى فى عمل فيلم بفكرة جديدة خيالية ولكن صمم يكون ابطال فيلمه ناس يمثلوا لاول مرة
فبدأ يلف ويدور فى قصور الثقافة والفرق المصرية عن اشخاص ينفعوا لتمثيل فيلمه واثناء بحثه نزل المنيا وراح يتفرج على فرق كتير وكانت منهم فرقة بانوراما
فعجبه اداء وتمثيل الست ام ماريو ولقى ان ملامح وشها مناسب جدا لدور بطلة فيلمه واختارها لتكون البطلة وطبعا لما عرض عليها الفكرة فوافقت عالفور وصورت الفيلم فى اخر ٢٠٢٠م وقرر المخرج عمر الزهيرى يشارك بفيلمه دا واللى اطلق عليه اسم ( ريش ) فى المسابقة الرسمية للنقاد فى مهرجان كان
وللعجائب ان يعلن عن فوز فيلم ريش بالجائزة الكبرى للنقاد بمهرجان كان ويصبح اول فيلم مصرى بالتاريخ يحصد جائزة رسمية بمهرجان كان ويتم ابلاغ ام ماريو بالخبر واللى ما صدقتش نفسها من الفرحة وراح اهلها وجيرانها يباركولها ويهنوها ويتصوروا معاها واقاموا الافراح بقرية البرشا فرحا بأن بنت قريتهم أصبحت نجمة عالمية
وفى يوم وليلة تحولت ام ماريو الست الصعيدية الغلبانة الشقيانة بقرية منياوية الى بطلة سينما عالمية ويتكتب اسمها فى تاريخ الفن المصرى ان دميانة اول ممثلة مصرية لاول فيلم مصرى يحصد جائزة بمهرجان كان
مبروك لمصر ومبروك للست دميانة ومبروك لكل سيدات مصر ....
