العلاقات السامة لما القرب بيبقى أذى
بقلم: رباب عطية
مش كل علاقة في حياتك نعمة، في علاقات بتبدأ حب واهتمام وتنتهي بضغط وتعب واستنزاف نفسي. المشكلة إن العلاقات السامة مش دايما بتبان من الأول، بالعكس بتدخل حياتك بهدوء لحد ما تلاقي نفسك بتتغير وبتتعب وبتفقد جزء من نفسك من غير ما تاخد بالك.
الحقيقة اللي محدش بيقولها، العلاقة السامة مش بس خناقات أو مشاكل، العلاقة السامة هي إنك تمشي على أطراف صوابعك عشان متزعلوش، تخاف تقول رأيك، تحس إنك دايما غلط وهو دايما صح، تفضل تدي وتدي من غير ما تاخد أي حاجة. ببساطة العلاقة السامة بتخليك نسخة أضعف من نفسك.
إزاي تعرف إنك فيها، خلي بالك من الإشارات دي، بتبرر الأذى عشان هو مش قصده، بتستحمل أكتر من اللازم عشان العشرة، بتحس إنك مرهق نفسيا طول الوقت، ثقتك بنفسك بقت أقل بسببه. ولو بصيت لنفسك كويس هتلاقي إنك مش مرتاح حتى في اللحظات الحلوة.
الخروج مش سهل بس ضروري، أصعب حاجة مش إنك تمشي، أصعب حاجة إنك تقرر إنك تستاهل تمشي.
بلاش تكدب إحساسك، لو حاسس بتعب يبقى في سبب، متقنعش نفسك إن ده طبيعي. حط حدود حتى لو اتضايق، اللي بيحبك بجد هيحترم حدودك مش هيكسرها. بلاش تستنى يتغير، اللي عايز يتغير بيتغير، إنما الاستمرار في الأذى اختيار. اختار نفسك حتى لو هتزعل، أيوه هتزعل وهتشتاق ويمكن تضعف، بس هترتاح ودي أهم. امشي لو مفيش حل، في علاقات مينفعش تتصلح لأنها من البداية غلط.
في الآخر خلي الحقيقة دي دايما قدامك، اللي بيأذيك مش مكانه في حياتك مهما كان قريب، ومتقنعش نفسك إنك لازم تستحمل عشان الحب، لأن الحب الحقيقي مش بيكسرك ولا بيقلل منك ولا بيخليك تحس إنك قليل. أنت مش مطالب تضحي بنفسك عشان حد، أهم حاجة أي علاقة صحية المفروض تخليك تحس بالأمان والراحة مش الخوف أو الضغط، والبعد عن الأذى مش ضعف ده احترام لنفسك، ولو مفيش تغيير فكر في الانتهاء.