محير أمري
كتب- محمد فوزى
إنت حقيقي محير أمري وأنا منك فايض بيا هموم
معقول إنك كده بتحب أوكان نِفسك تتحب ف يوم
دا انت لا تعرف للشوق طعم ولا خاصم عينك نوم
ولابحر الهوا شالك على موجه ولا تعرف حتى تعوم
ولا سهر الليل لفّك في سواده باصص للسما بتعد نجوم
ولا نسّم يوم الهوا على قلبك ولا طِيرُه حواليك بيحوم
ولا قلبك دق مع رسالة لها رنه ف تليفون مكتوم
ولا عشت بقلبك حالة جميلة ولا شايف لدا كله لزوم
وآخرة صبرى انا بطلع برسايل مافيهاش كلمة حب تدوم
زي قليل البخت وشايل حبة فكة ف جيب مخروم
ولا كلمة حب تبل القلب إنما ساكت دايماً وكتوم
شكلك سيبت الإحساس للناس وناوي تعيش معدوم
انت ياحالة حب جميلة وأنا كنت طرفها المهزوم
ومشاعرك نامت نومة طويلة وياعالم إمته تقوم
وابنيلك في الهوا أحلام بتروح اول ما اصحى من النوم..
