ما تزعليش
للشاعر والأديب
عماد الدين محمد
ما تزعليش لو الظروف
وقفت بيني وبينكِ
والدنيا كلها نسيتني ونسيتكِ
متزعليش
لو الكلام منا تاه فى الطريق
ولو السطور اللى عليه إنكتب
مسح الزمان حروفه
ماتزعليش
لو المسافات كل يوم تبعدنا
والسما ما سمعت غنوتنا
والليل نجومه ما طلعت
والقمر لينا ما نور عتمتنا
ماتزعليش
عاوز أقولك حبيبتي ماتخافيش
اللى بيني وبينك أقوي من الزمان
وعهدي ووعدكِ كتاب وبيان
ماتخافيش
لو كل شئ عاند معنا
والحلم منه نصحى وما نكمله
حتي ساعات ننساه ما نذكره
ماتخافيش
هانرجع أكيد وننسج حروفه
هانبداء معها من جديد
أو حتي هانغزله
حلمى وحلمكِ واقع
وحقيقة مهما غاب
شمس النهار تطلع وتسلمه
نتولد من جديد أنتِ وأنا
عهد جديد ووعد نرسمه
فى دستور الحياة قانون
أقولكِ ما تسأليش
سبيها على اللى خلقنا
واللى بيجمع القلوب
بعد ما كان النصيب خلاص
للفرق بيسلمه
ما تسأليش ما تحتاريش
عمر الحب الحقيقي
ما فى زمان ولا حياة
تقدر تفضله
ولو فى الدنيا ما إلتقينا
ما تلزمنيش الحياة
عند الرحيم يوم الدين
حبي وحبكِ هانكمله
وهناك ما في فراق
طول ما القلوب لله
صافيه وراضيه
أكيد ربنا هايوصله
ماتزعليش وما تخافيش
ولا تسأليش .