فضفضة لله
وسام علي
تنهيدة كبيرة بحجم الكون
مع سَيل م الدمع وأنادي "يارب "
أنا جايلك يعني وكلي ذنوب
رافع إيدي
بأدعيك من لُطفك ترويني
تبعتلي الرحمة فـ هيئة توب
ألبسها فـ ضعفي تقويني
"عبدك خايف "
"جايلك تايه"
ومالوش فـ الدُنيا أمان غيرك
إسمحلي أفضفض وأحكيلك
عن كُل مشاكلي اللي عارفها
وعن كُل ذنوبي اللي شايفها
ولازلت بسَّتْرك مراعيني
وحدك شايف
الدمع السايل من قلبي
قبل مايوصل حيِّز عيني
"الناس ع الأرض بتئذي يارب"
سلَبوني الفرحة اللي فـ روحي"
أنا بأطلُب عَدلك بس يارب
مظلوم وبطالب بحقوقي
وانت العادل وحدك قادر
تسقيهم من سِم نفوسهم
وترد الظُلم بنفس الظُلم
من نفس السِم اللي فـ كاسهم
وتنزل على قلبي سكينه
فأرجع تاني
كما كُنت زمان طفلة
جميلة
بأزرع فـ ورود وأخلِص فـ عهود
وأرسم فراشات
على كُل الحيط اللي فـ بيتنا
أسمع حواديت وأغزِل أحلام
يرجعلي فـ حُضن الدُنيا مكان
يغمُرني أمان طفلة بريئة
بتخاف م الليل وتحب النور
تِفرِج عن طير فـ يعدي السور
تخلق له براح علشان حَباه
تفتح شِباكها وتستناه
على أمل إنُه هيجي يزورها
لساها بتفرح بالألوان
مادابتش عيونها من الأحزان
ولا شافِت كَسر فـ غَيرها
"طَمني يـارب"
"رَجَعني يـارب "
بنوته بتعرف تاني تطير
ومحدش قَصقَص جِناحاتها🥀
