كل البشر
بقلم-ربيع خليفه
كل البشر فترات
كل الدموع مواويل
والقطر عدي وفات
وانا لسه بعد نجوم الليل
وانا لسه بشكي
وانا لسه بكتب شعر
وشايف في عيونكم اني شاعر
اكيد موهوب لكني حزين
كل البشر ناقصين
وانا اصلي واد من طين
بنجرح من العايشين
وبجرح قلوب مساكين
وانا جرحي كان سكاكين لكل اللي حاوطوني
ولو هتاخدوا عيوني هتقولوا مش كافيين
كل البشر ناقصين
انا يمكن شاعر وحزين انا اصلي ساعات بكون جدع وامين
ودول مينفعوش مع ناس وحشين
لذلك بقول كل البشر ناقصين
انا اه بسامح
اوقات بصافح في عدايا
ومازلت بجري امام من كان بيجري ورايا
علي ايه يا حزين بتتحمل
مش كنت اطيب
مش كنت اجمل
مش كنت جردل بكا لاحضانهم
وبقيت بشوف الويل في احزانهم
وكفوفي مش دافيين
انا بغفر غلط تايبين
وبسيب في ناس وبمسك في ناس تانيين
كان مالك يا واد يا حزين
واقف جدع وامين
بتاصحب الوحشين وتنصحهم
بيدبحوك وبيسبوك بفرصه تجرهم
وانت اللي كنت عبيط
كفاياك بقا تنطيط علي ارض مش عجباك
اياك في يوم تظيط علي بنت تستناك
كفاياك بقا والدنيا مش حباك
بتقولك استني عشان تجرحك وانت اللي كنت بسيط
كفاياك بقا يا عبيط
كان جابلك ايه التنطيط غير بس وجع القلب
وانا اصلي واد مش كلب
والكلمة راح تجري وتلف بلاد
وراح تيجي ويجيبها نفس الذنب
انا كنت شايفني اب
لحاجات كتير ملكي
وبقيت يتيم بحاجات في الاصل مش ملكي
راح اقولك اتاخري خديني حداكي
كفاياني لوم وراكي
انا بردو سايقني عشقي
لو يوم هكون اشقي انا بردو هستناكي
وتقولي اني عبيط
بكفايه بقا تنطيط
انا لما اكون جدع
مع ناس شافتني ودع وما رميتني
انا لما امي تموت وما لحقت ربيتني
هحس اني ما جيت
كان مين فينا ناصح واصبح عبيط
من ديوان لحظة فراق
