خليك في حالك

جرة قلم ـ أمل فرج

جه الشتا وعدى، ولسه هدوم ما لبستهاش..

جه الشتا وعدى، وناس هدومها ما قلعتهاش..

بدأ العمر وعدى، وأيام لسه ما عيشتهاش..

وناس عايشة أيامها و لسه ما بدأتهاش..

ناس فهمت الدنيا، والدنيا ما فرحتهاش..

وناس مش فاهمة الدنيا، والدنيا ما زعلتهاش..

ناس تعبت في حياتها، والدنيا ما ريحتهاش..

وناس باينة فرحتها، وأوجاعها ما تشوفهاش..

متقسمة هي، والقسمة ما تعرفهاش..

ربك موزع الأرزاق، اطمن ما تحسبهاش..

واللي انت فاكره مرتاح، عنده أوجاع ما تعلمهاش..

قسمة العدل ثقة في حكم الله و حكمته..

و إن مافيش إنسان ماشي في سكة مش سكته..

مافيش بني آدم هياكل لقمة مش لقمته..

إوعى تبص لبني آدم في ضحكته..

انت ما تعرفش أد إيه الدنيا بكته..

ما يغركش إنسان لو كانت غالية هدمته..

ياما ابن عز، والدنيا هدته..

وياما غلبان و دعوة رفعته..

ما تحاولش تفهم الناس، كل واحد ليه علته..

ما تحسدش فرحان على فرحته، ده ياما الدنيا وجعته..

خليك في حالك، وكل واحد يخليه في دنيته..