كان يا ما كان. .عايزة تربي أولادك صح وببلاش؟؟؟؟الحلقة الثانية
كتبت- يسرا عاطف
إستكمالا لما تحدثنا عنه في الحلقة السابقة عن طرق وأساليب التربية الناجحة لأولادنا ،، تحدثنا عن خمس نقاط نستكمل معا باقي النقاط..
6- تغافلي كتير كإنك مش شايفة اخطاؤة المتكررة .. ولما تقفشيه ف حاجة غلط عرفيه ساعات إن إنتي كان ممكن تعملي كذا وكذا كعقاب، بس هتسامحيه المرة دي علشان "بتحبيه" و"مش بتحبي تزعليه".. مع بعض الحزم طبعا وإنه يفهم إن مش كل مرة كدة.. لان أساس الحب هو التغافل عن بعض الاشياء المزعجة لنا .
7- أعطي لابنك مساحة خاصة لاحلامه الخاصة به هو، خليه ياخد قراراته بنفسه مع توجيهاتك طبعاً ، عوديه انه مسؤول لوحده عن قراره وانه لازم يتحمل عواقب اختياره هو له حلمه الخاص به هو مش أحلامك إنتي هو مش مجبر انه يحلم حلمك انتي وينفذة لأن الحب_مش_أنانية.
8- كل أم تحب تشوف ولادها زيها أو احسن كمان هذا الشعور بيخليها تشوفه بعنيها هي ،، فهميه إنك هتحبيه حتى لو ما طلعتيهوش نسخة منك.. المهم يبقى رجل صالح لأن الحب_حرية
9- الأطفال من الجنسين في سن المراهقه عليهم تقل دم رهيب معلش استحملي نكته السخيفة.. واكتبيهاله في ورقة و شيليها للذكرى في برطمان الذكريات ،، فكرة رائعة عن تجربه و اكتبي تحتها "عشان تعرف أنا استحملتك اد إيه يا حبيبي أصل الحب_استحمال
10- بلاش نعامل أولادنا وكأننا في الجيش أوامر واحد + واحد يساوي إثنين كل كلامك في صيغة أوامر وتعليمات وكأنه مواطن درجة ثالثة ليس له أي حقوق او حق الاعتراض ،، اعتبريه صديق تحدثي معه في مشاكلك واشركيه فيها واطلبي منه الحل لانك عاجزة عن حلها ومحتاجه مساعدته اصل الحب مشاركة.
