بقلم:الشاعر د. علي مسلم عجمي
------------------------
البيكون بيتو من القزاز معمرو
و بيت جارو بالصلابة ممسمرو
لا يراشق بيت جارو بالحجار
حجارة الجيران بيتو بتدمِرو
البدُّو يكون (جَمَّال) في بيتو الحلو
و شيخ منصَب و العُمُودية إلو
بدو يعللي باب بيتو و عتبتو
و بالمودة الناس تقدر تدخلو
أي كِسِر ممكن بالعلاج نْصلحو
إلا القلب ما بينجبر لو تجرحو
و مهما العلاج يكون فوق المستحيل
الكِسِر بدو يظل باين مطرحو
إزرع الخير بتحصدو محبة و خلود
عاشر الناس و ظلك بضمن الحدود
اللي بيزرع قمح ما بيحصد زوان
و اللي بيزرع شوك ما بيحصد ورود
لما وباء العصر بالعالم بدا
تفرقوا الأصحاب كل من عا حِدا
خايف بعد ما ينتهي بخير و سلام
يصير عادة و ما حَدا يقابل حدا
نِمت و معايي كان مجموعة صحاب
بيناتنا إلفة و مودة و شو قراب
و من قبل ما تِرحل الشمس على الغياب
صحيت على شوفة صار عندي إكتئاب
حولي ذياب و دم سايل عالتراب
ذياب شرسة بقوة عظام و نِياب
إما الذياب افترست صحابي المَعِي
إما صحابي تحولوا و صاروا ذياب