إلي نهر النيل العظيم للشاعر " محمد زهران" من ديوان
" جنين الحلم"
عرض - صالح العواد
من حليب النيل وخيره
هاتي منه ودوقيني
طعمه حلو وشهد سكر
هاتي تاني منه أكتر
هاتي منه ورضعيني
واما تطلع يوم سناني
ع السمك ابقي افطميني
واما عيني تبقي رمدا
قطّري من النيل في عيني
تتغسل كل المشاهد
والقي شكل الدنيا أحلي
خضري الأحلام بسيرته
ضمدي جارحي بصورته
بالقي نفسي ارتحت جنبه
صدقيني بيدويني
رشي فوقي مرة تالتة
فوق جراحي الناطقة تخرس
واما تيجي تجوزيني
بنت م النوبة البسيطة
ولا من المنصورة برضو
بنت محلوّة وأليطة
رشي فوقي وعطريني
واما ييجي الموت ياخدني
رشي فوقي مرة رابعة
أيوه منه وغسليني
فالملايكة تزيد حساني
جنب اقرب حتة هادية
جار هويسه وادفيني
#محمد_زهران من ديوان #جنين_الحلم
