في القلوب حكايات ومعانا حكاية ولا في الروايات حكايه "ندي"
كتبت - بهيه كساب
أصعب وأجمل لحظة في الحكاية هي "لحظه معرفه أن البنت عائشة موجوده ".
لما راحوا يبلغوا أهل ندى إن بنتهم عايشة، وورّوهم صورتها..
--الأم في لحظة، من غير تفكير، دموعها سبقتها وحضنت الصورة كأنها بتحضن بنتها فعلاً، وقالت بقلب محروق وفرحان: "أيوه هي دي بنتي.. نفس الملامح اللي كنت برسمها في خيالي كل ليلة، كنت بسأل نفسي يا ترى شكلها بقى إيه؟ وطلعت زي ما حلمت بالظبط".
-- أما الأب، فجرى زي الطفل الصغير، جاب صورتها وهي طفلة وقالهم: "أنا كنت كل سنة بكبّر صورتها دي عشان أتخيل هتبقى عاملة إزاي لما تكبر.. هي فين؟ ليه مجبتوهاش معاكم؟". أما الجدة، فكانت ماسكة الموبايل وبتبوس في الصورة وتقول: "كنت عارفة إني مش هموت قبل ما أكحل عيني بشوفتك يا بنتي".
--ندى بالذات توجع القلب وتفرحه في نفس الوقت. تخيلوا بنت تغيب عن حضن أهلها 12 سنة كاملة.. اختفت وهي طفلة عندها 7 سنين، ورجعت عروسة شابة عندها 19 سنة.
-- إزاي الحكاية بدأت وإزاي انتهت؟
في أبريل 2014، ندى نزلت تشتري طلبات من منطقة "الظاهر"، وفي وسط زحمة خناقة في الشارع، خطفتها واحدة "عاملة نظافة" وضيعت أثرها. الخاطفة مش بس سرقت سنين ندى، دي زورت أوراقها ونسبتها لجوزها، وعيشتها في ذل وحبستها 3 سنين، وبعدها نزلتها تشحت في الشوارع.
خيط الأمل.. "حكاية نرجس":
العدل مبيضيعش، وفي رمضان اللي فات، كان في مسلسل اسمه "حكاية نرجس" بيتكلم عن خطف الأطفال. "أحمد" جوز بنت الخاطفة شاف المسلسل وشك في قصة ندى، ولما نبش ورا الأوراق لقاها مزورة. متأخرش لحظة، وكلم صفحة "أطفال مفقودة"، وطلعت كل المواصفات هي ندى.
الداخلية قامت بدورها، والتحريات أكدت كل حاجة، وبتحليل الـ DNA، رجع الحق لأصحابه. مشهد اللقاء كان يقطع القلب، دموع السنين بردت، والدعاء اللي كان مبيفارقش لسان الأم استجاب.
ألف مبروك لندى رجوعها لحضن أهلها، ويارب يعوضوها عن كل يوم غدر عاشته، والف حمد الله علي سلامتها