تشخيص وقراءة لمرض مجتمعي
بقلم: محمد الطويل
اجعل طبعك دائما اعمل الخير وارميه فى نهر جارى .. لو منفعش عند الخلق ينفع عند البارى مع الحرص على تحقيق الاخلاص ، لأن منتظر الشكر والثناء ، الواقع فى فخ وقد قيل ـ سيخرج فى نهاية الرحلة خالى الوفاض , وهو كمن يدخر فى كيس مثقوب ؛ خاصة أن حال اغلب الناس ولو حرصت هو نكران الجميل وقلب الحقائق بعد انتهاء المصالح ، بل تشويه من كانوا بالأمس يمشون فى ظل احترامهم .
واليكم رؤية وتصور رائع للزميل مدحت العدوى يقول فيها : ناكر الجميل لو أنقذته من الغرق هيقولك كتر خير البحر هو إللى رمانى على الشط ولو سقيته من النهر هيقولك لولا المطر كنت مت من العطش ولو أكلته عسل هيقولك كتر خير النحله إللى عملت العسل.
أصعب أنواع الناس إللى يأكل خيرك ويقولك أنا مشفتش منك خير .. الناس دى مش بيعبها قلة المعروف دى بيعبها قلة الأصل.
ناكر الجميل عمره ما هيشوف تعبك ولا هيعترف بفضلك لأن المشكلة مش فى الجميل ولكن المشكلة فى العين إللى اتعودت تنكره.
فيه ناس لو شلتها فوق رأسك تقولك أن ده حقها ولو ضحيت علشانها تقولك دا واجبك ولو
وقفت معاهم وقت الشدة هيقولك أى حد مكانك كان هيعمل كده.
ولو ربنا فتح لها باب اول واحد سيت تجاهله هو أنت لأنهم بينسوا إللى ساندهم وهم مكسورين وينسوا إللى كان موجود يوم ما الكل اختفى.
بس أفتكر حاجة ناكر الجميل ما بيجرحش إللى قدامه هو بس بيعلن فقر أخلاقه وقلة أصله.
ناكر الجميل أول ما يلاقى بديل عنك بيتصرف كأنه عمره ما عرفك.
علشان كده متزعلش ولا تندم على خير عملته وأعمل المعروف وأرميه البحر ولو ناكر الجميل نسى معروفك وخيرك رب الناس لا يمكن ينساه.
وكفاية يفضل طول العمر فاكر من جواه ومتأكد أن خيرك عليه وأنك كاسر عينه وبس هو بيكابر لأن قلة أصله غالبه عليه.
ناكر الجميل يظن نفسه ابو العريف ، ويتكلم كثيرا فى اى مجال ، لكنه فى حقيقة الأمر جلف غبى مفضوح جدا ، وليس لديه ثقة بل سريع الشك ، فمن صفاته أن كلامه وأفعاله متناقضة وبقليل من التركيز تستطيع اكتشاف ذلك بوضوح ، فقد يذم فى أمر ثم يمدحه حسب الموقف والحالة ، وقد يؤكد أن مشروع معين خسران وغلطة العمر ثم تراه يعمل نفس المشروع بل بتوسع ، ومن أهم صفاته أنه إذا مدحك مجلس الرجال تراه حريص على قطع الكلام عنك ، وتغيير موضوع مدحك إلى اى موضوع اخر ، حتى ولو كان كيف تصنع صينية مكرونه بالبشاميل ، و لو كان الحوار دائر حول تشويه صورتك ولو من باب المزاح والهزار ، تراه انفرجت اساريره يضحك ملء فيه .. واخيرا : إذا مدحته لم يلتفت اليك وإذا اهنته احترمك .