حين تنتهي مساحة التقدير
بقلم: أم هاشم العيسوي
احنا مش بنشتري بايع
ولا بنقلب في اللي فات
ويوم ما تيجي علينا
بنمشي بكرامتنا ومن سكات
عتابكم وقت ضايع
وغلطكم عدى كل الصفات
عدينا بدال المرة ألف
وقلنا ياما بيحصل.. كلها رفايع
قولتوا في كل مرة: جايز ظرف
وكنا نقول: وماله؟ الحب أكبر بكتير
ولا مرة راعيتوا خاطرنا
لا بالكلمة ولا بالحرف
بس خلاص.. كفاية قلة تقدير
اشترينا كل مرة بيعة خسرانة
والمقابل كان من طاقتنا كبير
بس شابو عليكم وبالأمانة
طلعتوا بتفهموا
وكدبة لو قلتوا: خانكم التعبير
قلوبكم صعبة وطباعكم حجر
ولا يتحمل قسوتها الجبل
تعبتوا؟ جايز من قلة الإخلاص والتحوير
وأوعوا تحطوا الحجة علينا وعلى القدر
عشان انتوا لازم تراجعوا نفسكم
وواجب على طباعكم التغيير
ومش هنرجع تاني نبرر
ولا هنفتح كلام فات
إحنا اللي اخترنا نمشي
وبكرامتنا ومن سكات
كفاية عشم في ناس
ما حفظتش يومًا الوداد
إدينا من قلبنا كتير
وفي الآخر كان جزانا بعاد
مش زعلانين على اللي فات
ولا هنقول كان نفسي يزيد
إحنا لما مشينا بإرادتنا
كان عشان خلاص.. مفيش جديد