الهزايم..الشاعر /مصطفى مقلد
على الباب مخاوي
يا سيدنا المداوي .. قابلني
انا الخوف هبلني
وكترت عليا الهزايم
وماعرفش مين اللي باعت باسمي الشتايم
لأمي الحبيبه
وما عرفش مين اللي حط المصيبه
في جيب القميص
ومين الخبيث اللي وقع ما بيني وبينها
ف كل الفصول
وانا مش هاخبي
انا لو قتحت الهويس كنت اقول
وكنت افتخر بالجريمه
انا مش مهيأ لتلك الفعال العظيمه
انا زي ناس البلد دي
ضعيف ف التحدي
بأرحل هزيمه
وأرجع هزيمه
مفيش للهزايم نهايه
مافيش للضحايا امتداد
ولو لك ولاد. أكيد يشبهوك
شبه إنت وارثه زمان عن ابوك
ويتوارثوا دورك ف نفس الحكايه
دعايه عن الفيلم ماليه الجرايد
انا المتهم بانتمائي لعنيها
بنص القصايد....
مدان بالحنين اللي زايد شويه
لحد الجنان
انا متهم إني رحت الميدان
قبل عام الرماده
واني اللي شاهد عيان
ع الجدل والمؤامره
واني صرخت :
انتي فينك يا سمره
(يا فارده الضفاير على البرتقان)
وما اعرفش مين اللي بلغ هامان
عن وجودي ف قصيده
وقال له القصايد .. وجود
وماعرفش مين اللي عود ايديا القيود
وعود قيودي ايديا
وما اعرفش مين اللي سرب دوسيه القضية
وشهد عليا وحبسني
وماعرفش مين اللي حاسني وداسني
ومين اللي زايد عليا في يوم المزاد
وماعرفش مين اللي زاد واللي عاد
ماتعرفش مين اللي عارف ياباشا
ماتعرفش مين اللي عارف يا صاحبي
ماتعرفش مين اللي عارف ياواد
======
#_ما_بتسلمش_مصر_عليك