مجانين التيك.. توك
بقلم -شيرين راشد
السوشيال ميديا جنان والتيك توك.. كمان
الكل عايز شهره الكله جعان للمال ودماغهم في التوهان ..
ولا فارق معاهم عيب ولا حتي حرام ..!!
المهم يكبر دماغه حبه ويكون غني قوام فيديوهات ملهاش عدد تفاهه وقلة أدب بنت و رجل وشايب والكفه مالت أزاي..؟!
لا كسوف ولا حياء ولا دين بس نكون ترند ونقبض القرشين
والكل يظبط نفسه والعيشة تبقا زين ..
التمن غالي أوي لكن ولا فهمين إننا كده بننزل ولا عمرنا طالعين...
ولو نصحت واحد فيهم تبقا مش متحضر ومن المتخلفين ..
عصر عجيب وغريب أتبدل فيه الحال..وبقينا بنطلع لايف لعيون الدولار لا تقولي دين ولا شرف بالغني الدنيا تهابك ولا تسألك سؤال ..
شغلهم الشيطان وجننهم بالمال ماهو جنون الشهره مرضى دي الأيام بنت تعرض نفسها والتانيه تعري جسمها واللي تغني وترقص ولا في حياء ولا خجل وشبابنا مبسوطين ..ولا عارفين أهلهم فين عنهم غايبين ملعون أبوك يامارك قضيت ع النخوه فينا ورحلت الفضيله ووقفت حال الناس لا شغله ولا مشغله ولا حتي فيه اخلاص ..
والله قبل منك كنا مرتاحين وببعضنا حاسين كانت حياتنا سهله ودايما فرحانين ..لكن النهاردة معدش حد منا يدق علي التاني الباب بعدنا كتير وبقينا كدة من الأغراب
ولو يوم زورنا بعض يبقي الشاي والشاحن ورقم الويفاي قبل أي كلام الله يرحم لمتنا وسهرتنا زمان الضحكه كانت حلوه بتسمع الجيران دلوقت حالت صمت الست جانب جوزها وتكلمه ع النت بعدنا كتير ياناس حتي بالإحساس..
يابنات خفوا شويه وبلاش كلام ع النت ويلا إحترامو روحكم وإحذفوا التيك توك ..شهادتك هي سلاحك وكل دنيتك سيبك م الفيس ياحلوه وشوفي مذكرتك ..والنت وقت الفضا يبقا لعبتك
