الشاعر… د.علي مسلم عجمي
بحس فيكي ببسمة الطفل الرضيع
بحس فيكي عالقلب همسة ربيع
بحس فيكي كل ما طل القمر
بحس فيكي يا أمل حلمي البديع
بحس فيكي كل ما هَـب الهوا
و يلعب بشعراتك و يطيرهن سوى
بحس فيكي بكل نبضة عاشقة
إحساسها إحساس عشـَّاق الهوى
بحس فيكي بلَيل عا ضو القمر
إحساس عشاق المحبة و السَمَر
بحس فيكي شعاع جواتو حنان
بكل إحساسو تباريحو غَمـر
بحس فيكي صوت بلبل أو كنار
يعزف موسيقى موشحة بإكليل غار
بحس فيكي سندريلا هايمة
بالعشق صيف وشتا و بليل و نهار
بحس فيكي قَلَـم أروع ما كَتَـب
للحب. للفرحة بـِأحرف من ذَهـَب
بحس فيكي عبقرية فيلسوف
عَبَّـى المكاتب كلها شعر و أدب
بحس فيكي تاج عا راس الشهيد
غَـذَّى بدمو الأرض ت ازداد الحصيد
بحس فيكي مواطنية للوطن
التاريخ أرَّخها و كَتَـب فيها قصيد
بحس فيكي نبع أشواق و حنين
بحس فيكي عطر زهر الياسمين
بحس فيكي رافعة غصن السلام
بالشمال و حُلُـم أبيض باليمين
بحس فيكي تَـعَـب عكازة ضرير
بحس فيكي صُـدُق دمعات الفقير
بحس فيكي تاج عِـز و إفتخـار
عا راس أم لطفلها تْـهِـز السرير