بحر الهيام.. قصيدة بقلم الشاعر وائل مسلم
شراع الغرام فارد في بحر الهيام قلوعه
وانا مراكبي والحب ساكن في قلبي وجوه أحشائي وضلوعي
بعوم في بحر هواكي وعايز أنول رضاكي
وأجازف في موج عاتي
وفي لحظة غابت شموس الهوى
والنار لهيب في قلب بالحب داب وانكوى
والموج في البحر عالي
لكن علشان بحبك يا غالي
ميهمنيش من المستحيل
ولا أخاف من ليل البحر الطويل
لأني عارف إني هوصل جزيرة الأحلام
وقلبي عملت له بوصلة بتشير لسهم حبك
وضحكتك من بعيد واصلة لي
يا مركب العشق على فين مودّيني
دي جنة حبيبي من بعيد بتناديني
سمعتها من بعيد بتقول منتظراك يا عمري
أرجوك يا مركب عليها تودّيني
عايز أوصل أوام
وأعيش معاها في جنة الأحلام
ولما وصلت هناك لقيت حبيبتي منتظراني في شوق ودلال
يا سلام عليها أميرة منوّرة الجزيرة
وحسّيت إني في أمان ونجيت من الطوفان
ولما ارتميت في حضنها لقيته لسه حضن حنان
افرح يا قلبي ما خلاص وصلت لبر الأماني
ولقيت في عينيها عنواني
علشانها أحقق المحال
لأن حبها في بحر الغرام دليلي
وفي جزيرة الأحلام لقيتها هي اللي عن لوعة الشوق بتحكي لي
قلت لها: وإيه اللي رماني في بحر الشوق
غير الحنين والعشق اللي في القلب بقاله سنين
وخلص الكلام ودبنا في بعض في غرام وهيام
وزقزقة العصافير وشدو البلابل معانا فرحان
وعشنا في جنة الأحلام
يا محلاها أيام ولحظات عشق وهيام