شعر/ رويداــ هشام ابراهيم
بيقولوا علينا جيل فاشل
جابونا في دنيا مظلومه
وحاطين اللوم علي أبونا
جابونا في دنيا مكشوف حاضرها
ومين ناصرها
الغلبان ولا ابن البيه
ابن الغلبان شغله متهان
وابن البيه شغله متعان
وعايزين نعمر فيها
ونوفيها
وفين الاساس دا الكل محتاس
والغلبان بقا مداس
وابن البيه
علي ابوابه حراس
واهو اختلاف اجناس
وانا حلمي بسيط
شغله بعد العلام
وايام بلاا اوهام
وتخطيط لايامي
وصميم لأحلامي
حلم كل شاب عادي
زوجه وبيت واربع حيطان
وريعان لمستقبل
وتأمين حياه
لأجل النجاه
وشهادة حق لو يوم مظلوم
معلوم بدنيا اتملت زور
وحور العين ياما شافت
وجافت بدموع
ومين موجوع
الغلبان ولا ابن البيه
دنيتنا بقت بالجنيه
معاك هتعيش
والباقي براويش
عايش علشان لقمة عيش
بقت الشهاده زي النيش
موجود علي مفيش
واجب النصب ولا يجوز الرفع
نحو الحياه اتقرأ
والراجل عمره اتطرأ
وفين الحاكم ومين المحكوم
دا الظلم بالكوم
والعدل محكوم
نار تلسع ولا تموت
سنين مُره ولا تفوت
ايام حره ولا تسَيب
امل فيك واتخيب
حياه باظت
وناس هاصت
الغلبان ولا ابن البيه