بقلم/السيد حماد
وضاعت سنين عمري
بين أمنيات وتمني
وده يعشمني وده يطمني
وده يقولي بس اصبر
دابكره هايكون احلي
واعيش بين حلمي وخيالي
استني ولا شيئ جالي
واقول بكره هاتحلالي
والأيام تجاوبلي
علي سؤالي
لانا اللي عشت ايامي
ولا حققت أحلامي
وساكنه فيا أوهامي
ومش عاوزه عني تتخلي
وانا بالصبر بتحلي
لحد ماضاع عمري
واقول قدري
وارجع تاني واستني
وأعيش الحلم واتمني
ماهو برضو من حقي
أعيش الدنيا واتهني
واسأل هوه العيب مني
علشان عايشها بأمانه
لا انا بسرق ولا بغدر
ولا في الاذي بفكر
سليم القلب والنيه
والحراميه
متهنيه
والكدابين والأفاقين
والخداعين والنصابين
ليه احسن مننا عايشين
وبلاويهم مداريه
ولا احنا عنينا معميه
ردي يادنيا عنيده
واديني إجابه مفيده
ولا احنا م المكتوب ليهم
نعيش اوهامنا
وتموت معانا أحلامنا
وتكون امانينا اكفانا
ولما نسكن في قبورنا
يقولو حرام عايش ميت
ومات ميت
لايوم في الرزق زاحمنا
ولا في أحلامنا شاركنا
ولا كان عشمان في سلطه
ولا حتي مره سألنا
وارتحتي منا يادنيا
وارتحتي ليه
هوه احنا يعني كنا
ولا حتي كنتي فاكرانا
ماحنا دخلنا وخرجنا
من غير ماتحسي بوجودنا
احنا بس اللي حسينا
بتعبنا فيكي وشقانا
وخرجنا من غير
مانعرف حتي
إجابه علي سؤالنا
وليه عشنا وليه موتنا
واتكفنا بأحلامنا
شكرا يادنيا
مليون شكرا
لأننا منك خرجنا